Ұшақ «Yeti Airlines» әуе компаниясына тиесілі болған. Компания өкілінің айтуынша, бортта 68 жолаушы мен төрт экипаж мүшесі болған.
Апаттың себептері анықталып жатыр. Әуежай жабылып, құтқару жұмыстары жүріп жатыр. Жергілікті БАҚ Непалда құлаған ұшақтың барлық жолаушысы мен экипаж мүшесі қаза тапты, деп хабарлады. РИА Новости ақпаратынша, ұшақ бортында Ресейдің төрт азаматы болған.
«Ұшақта 72 адам болған, соның ішінде төрт экипаж мүшесі, 68 жолаушы бар. Біздегі мәлімет бойынша төртеуі Ресей азаматы», — деп жазылған хабарламада.
Зардап шеккендердің арасында Қазақстан азаматтарының бар-жоғы анықталып жатыр.
Непалда апатқа ұшыраған ұшақтың жолаушысы әлеуметтік желі арқылы тікелей эфир жүргізіп отырған. Марқұмның видеосы желіде тарап кетті.
El Dato Noticias Morelos арнасының мәліметіне сәйкес, 35 жастағы үндістандық Сону Джайсвал (Sonu Jaiswal) тікелей эфир арқылы ұшақтың қонғанын көрсеткісі келген. Бірнеше минуттан кейін «Yeti Airlines» әуекомпаниясының ұшағы апатқа ұшырайды.
