«Мемлекеттік төңкеріс жасауға дайындық болды, қастандық жасалды. Бүгін айтқанымдай, негізгі ұйымдастырушылар ретінде Ұлттық қауіпсіздік комитетінің бұрынғы басшылығы – К. Мәсімов пен оның орынбасарларына қатысты қылмыстық іс қозғалды», — деп жауап берді Бас прокурор.
Тілшілер Бас прокурордан Кәрім Мәсімовке қатысты тікелей сұрақ қойды.
«ҰҚК-нің бұрынғы басшысы Кәрім Мәсімовті тәртіпсіздіктердің басты ұйымдастырушысы деп санауға бола ма?» деп сұраған тілші сауалына:
«Солай айтуға болады», — деп жауап берді Берік Асылов.
Айта кетерлігі, бүгінгі Мәжіліс отырысында Бас прокурор 5 қаңтарда ҰҚК экс-басшысы Кәрім Мәсімов ҰҚК департаменттерінің ғимараттарын тастап кетуге бұйрық бергенін айтқан еді.
Осыған дейін Бас прокурор Кәрім Мәсімов ісі «аса құпия» режимінде тергелгенін айтқан еді. К. Мәсімов пен оның бұрынғы орынбасары Садықұлов:
- мемлекетке опасыздық жасау;
- билікті күштеп басып алуға бағытталған әрекеттер;
- лауазымдық өкiлеттiктерді асыра пайдалану бойынша сотқа берілді.
