Ұлыбританияның Бермингем қаласында ЕҚЫҰ Парламенттік Ассамблеясының 29-шы сессиясы өтті. Халықаралық басқосуда екі ел шенділері Еуропадағы қауіпсіздік және ынтымақтастық ұйымын тартылған теңізді құтқару үшін құрылған жобаларға демеуші болуға шақырған.
«Айта кету керек, бұл бастама аяқ асты көтерілген жоқ. Ол бірінші кезекте Мемлекет басшысының Арал теңізін және оған іргелес аумақты бірлесе отырып, қайта қалпына келтіру туралы тапсырмасы негізінде жасалған. Экономика, ғылым, технология және қоршаған ортаны қорғау мәселелері де қазақстандық делегация назарынан тыс қалмады. Бұдан бөлек, «Жаңа Қазақстан құру» тақырыбында cайд-ивент ұйымдастырылып, еліміздегі саяси, әлеуметтік-экономикалық реформалар таныстырылды», — деп ҚР Парламенті Сенаты Төрағасының орынбасары Асқар Шәкіров өз пікірін білдірген.
Сондай-ақ, жиында елімізде болып жатқан саяси өзгерістер жайлы сөз етілген. Шекара, миграция, қауіпсіздік пен ынтымақтастық мәселелері талқыланып, ЕҚЫҰ аймағында тұрақты дамуды қамтамасыз ету бойынша резолюция қабылданған.
