Онда «Балалар жылының» қорытындысы жасалып, облыс басшысы түрлі салада жеңімпаз атанған 50 оқушыны 100 мың теңгелік сертификатпен, Алғыс хатпен марапаттады.
Сондай-ақ республикалық «Жыл оқушысы» байқауының жеңімпазы Талғар қаласындағы Юрий Гагарин атындағы №8 мамандандырылған лицейдің оқушысы Ангелинаға Алексанова ҚР Оқу-ағарту министрлігі, Бала құқықтарын қорғау комитетінің Алғыс хаты мен бағалы сыйлығы табысталды.
«Жас дарындар! Мен сіздерді, осында отырған әрбір оқушыны, студентті мақтан тұтамын. Сіздер жас болсаңыздар да облысымызды танымал еттіңіздер. Сіздердің жеткен жетістіктеріңіз үшін ата-аналарыңыз бен ұстаздарыңызға да алғысымыз шексіз! Қазақстанның болашағы, еліміздің ертеңі- жастардың қолында. Тәуелсіз еліміздің гүлденуі мен өркендеуі үшін сіздерге Жаңа жылда жаңа жеңістер тілеймін!», — деді құттықтау сөзінде Марат Сұлтанғазиев.
Ал тілшілерге сұхбат берген Ш. Смағұлов атындағы лицей-интернаттың оқушысы Ақмарал Төкеннің айтуынша, дарынды балаларды қолдау – талпынысты одан ары жетелей түседі.
«Мен Ө. Жолдасбеков атындағы халықаралық ғылыми жоба байқауында ІІІ орын, Республикалық Қасымов Құлжамай атындағы олимпиадада І орын, 2018 жылы Республикалық жасөспірімдер олимпиадасында ІІІ орын, Республикалық «Дарын» интеллектуалдық жоба сайысында ІІІ орын, облыстық ғылыми жоба конкурсында ІІ орын иелендім. Бүгін бізге облыс әкімдігі қолдау көрсетіп, марапаттап жатқанына қуаныштымын! Мұндай игі шаралар оқушылардың талабын одан ары шыңдай түседі. Болашақта еліміздің қаржы және экономика саласының дамуына елеулі үлес қосқым келеді», — деді Ақмарал Төкен.
Айта кетейік, дарынды балаларды қолдау және терең білім алуына жағдай жасау мақсатында Қонаев қаласында мамандандырылған лицей-интернат салу, «Маралсай» демалыс аймағында лагерь ашу, облыс көлемінде Д. Қонаев атындағы жүлдені тағайындау, «Құрмет аллеясын» салу жоспарланып отыр.
