Аталған салтанатты кештің өткізілуіне Қаратұрық ауылдық округінің әкімдігі мұрындық болды. Шарада түрлі қойылымдар қойылып, әннен, биден шашу шашылды. Мерекелік шыршаға арнайы шақырылған балақайларға тәтті-дәмдіге толы қорап тарту етілді.
«Бұл кешті ұйымдастырудағы басты мақсатымыз – балаларға көтеріңкі көңіл-күй сыйлау. Ауылдық округтің құрамында 6 елді мекен болса да, осы уақытқа дейін ауқымды мерекелік шырша ұйымдастырылмаған. Демеушілермен ақылдаса отырып, Жаңа жылды осылай атап өтуді жөн санадық», — деді тілшілерге сұхбат берген Қаратұрық ауылдық округінің әкімі Айбек Ілебаев.
Аяз атаға тақпақ оқып, шағын концертті тамашалаған балалардың қуанышында шек жоқ.
«Бізге Жаңа жыл қатты ұнады. Балаларға тілерім келешектеріңіз кемел, болашақтарыңыз нұрлы болсын! Жалғаннан жамандық көрмей, өміріміз уайым-қайғысыз өтсін! Жаңа жыл құтты болсын!» — деді 1-сынып оқушысы Ақерке Дәулеткелді.
Айта кетейік, ауылдық округтің 17000-нан астам тұрғыны бар. Мұнда 56 мүмкіндігі шектеулі, 15 асыраушысынан айырылған бала тіркелген.
Посмотреть эту публикацию в Instagram
