«Алматы» телеарнасының хабарлауынша, жаңа асфальттың жұлым-жұлымы шыққанын айтқан жұрт жауапсыз мердігер компания өкілдеріне наразы. Бұл транзиттік дәлізден күніне шамамен 18 мың көлік қалаға кіріп шығады. Алматы-Қаскелең тас жолының бір бөлігі өткен жылы желтоқсан айында пайдалануға берілген еді. Айналма жолды салудағы мақсат — көлік кептелісін азайту. Республикалық маңызы бар бұл тас жолдың бойында көлік ағыны көп. Сондықтан жүргізушілер кептеліске шағымданып отыр.
«ҚазАвтоЖол» Ұлттық компания өкілдігінің айтуынша, айналма жолға кеткен қаржы 8 млрд теңге. Бұл республикалық бюджеттен алынған жауапты сала мамандары көлік жүргізушілерінің шағымына қатысты алаңдауға еш негіз жоқ деп отыр. Қазір көпір үстінің асфальт-бетон жамылғысы қайта төселіп, құрылыс жұмыстары Райымбек батыр көшесіне дейін жалғасады. Ол үшін көлік қозғалысы тоқтамайды. Жол жасаушы мамандардың айтуынша, жол үстіндегі асфальт қыста төселген. Сол себепті шытынап кетіп отыр.
«Желтоқсан айында пайдалануға берілген тас жол толық аяқталған жоқ. Алтын Орда базары маңында көлік ағыны көп болғандықтан уақытша аштық. Қазір 85 пайызға жұмыс аяқталды. Қалғанын күзге дейін толық аяқтап тапсырамыз», – деді «ҚазАвтоЖол»ҰК» АҚ Алматы облыстық филиалы директорының орынбасары Нұржан Таңатаров.
Ұлттық компания өкілдері: «Күз мезгілінде толық аяқталатын Алтын орда жолы 25 жылға дейін шыдас береді. Бұдан кейін тас жолға қатысты ешқандай мәселе болмайды»,-деп сендірді.
