Өңірдің тыныс-тіршілігі туралы баяндаған облыс әкімі ет өндірісінің кенжелеп тұрғанын айтты.
«Ауданда 1,8 мың басқа арналған 3 бордақылау алаңы және 2 мың басқа арналған 7 сүт-тауар фермасы жұмыс істейді. Бұл ретте, жыл басынан бері бұл бордақылау алаңдары бірде бір килограмм ет тапсырған жоқ. Сонымен қатар, ет өндірісінің төмендеуіне жол берілді», — деді Марат Сұлтанғазиев.
Оның айтуынша, биыл барлығы 23,4 мың тонна ет өндірілді, бұл өткен жылмен салыстырғанда 1,9 мың тоннаға аз.
Айта кетейік, мал шаруашылығында ірі қара мал басы бойынша аудан сегізінші орында (48,4 мың бас). Атап айтқанда, сиыр басы бойынша – бесінші орында (40,6 мың бас) және сүт сауу бойынша – Еңбекшіқазақ ауданынан кейін екінші орында.
