Мұны Alataunews.kz тілшісіне сұхбат берген облыс әкімі Марат Сұлтанғазиев айтты.
«Жерге байланысты жүргізілген талдаулар нәтижесінде 100 мың гектар жер мемлекет иелігіне қайтарылды. Тағы да 1 млн га жерді қайтару жұмыстарын жүргізіп жатырмыз», — деді облыс әкімі.
«Бұл процесс облыстың кей аумағында тез жүріп жатыр. 54 мың гектарға жуық жер ерікті түрде қайтарылды, ал қалған бөліктің мәселесі сот органдарының араласуымен шешілді. Жергілікті атқарушы органдар жерді инвентарлап, шаруашылықта малдың бар-жоғына талдау жүргізді. Анықталғандай, біреудің жайылымдық жері бар, ал иесі мал шаруашылығымен айналыспайды. Біз осындай деректерді анықтап, жер инспекциясына тапсырдық», — деді Марат Сұлтанғазиев.
Енді ауыл тұрғындары жер учаскелерін мал жаю және шөп шабу үшін пайдаланатын болады. Айта кетейік, Қонаевта Марат Сұлтанғазиевтің қатысуымен ауыл шаруашылығы қызметкерлері күніне орай салтанатты жиын өтті. Жиналыста шаруалар жайылымдық жердің жетіспеушілігі мәселесі жылдар бойы шешілмей келе жатқанын айтты.
Бұған дейін Мемлекет Басшысы Қасым-Жомарт Тоқаев пайдаланылмай жатқан жайылымдық жерлерді мемлекет меншігіне қайтару жөнінде тапсырма берген болатын.
