11 желтоқсан күні сағат 02.45-те Жетісу облысы Төтенше жағдайлар департаментіне Кербұлақ ауданында «Сараөзек-Көктал» автожолының 51 шақырымында екі автокөліктің қар құрсауында кептеліп қалғаны туралы қоңырау түсті. Шақыру орнына Сарыөзек ауылынан шыққан ТЖД қызметкерлері 3 жеңіл автокөліктен 12 жолаушыны қауіпсіз жерге көшірді. 4 бала жылыту пунктіне жеткізілді. Олардың жағдайлары жақсы, медициналық көмек қажет болмады.
Автожол тазаланғаннан кейін 18 жолаушысы бар шағын автобус Жаркент қаласына қарай жүруді жалғастырды.
11 желтоқсан күні сағат 23.20-да Алакөл ауданында «Үшарал-Достық» автожолында жүк көлігі жолда қалып, екі адам эвакуацияланды. Ақши ауылынан шыққан ТЖД құтқарушыларының күшімен екі ер адам Көктұма ауылының жылыту пунктіне жеткізілді.
Сонымен қатар, 12 желтоқсан күні сағат 01.25-те «Үшарал-Достық» автожолында қар құрсауында, салонында 7 адамы бар 3 жеңіл автокөлік тұрып қалғаны туралы хабарлама түсті. ТЖД құтқарушылары бұл автокөліктерді автожолдың тазартылған учаскесіне шығарып, олар өз бетінше жүруді жалғастырды.
Жетісу облысының ТЖД боранды күні алыс жолға шықпау керектігін және «112» қызметінің хабарламасына құлақ асу қажет екенін ескертеді.
