Жастардың дәріханалық нашақорлыққа қызығу деректері жиілеген. Өңір полицейлері осыған байланысты құрамында есірткі бар препараттарды рецептсіз сату фактілерін анықтау жұмыстарын күшейтті.
Талдықорған дәріханаларының бірінде фармацевт трамадол апиынды анальгетикті дәрігердің нұсқауынсыз сатқан. Фармацевтке қатысты жиналған материал фармакологиялық бақылауға жіберілді. Бұл дерек бойынша Қазақстан Әкімшілік құқық бұзушылық туралы кодексінің 426-бабына сәйкес, айыппұл салу жазасы көзделген. Соңғы төрт айда өңірде осындай 20 құқық бұзушылық анықталды.
Жетісу облысы полиция департаментінің хабарлауынша, есірткі және психоактивті заттарды сақтау, өткізу немесе дәрілік препараттарды дәрігердің рецептісіз сату фактілері туралы, сондай-ақ оларға қатысы бар адамдар туралы ақпаратты Есірткі қылмысына қарсы іс-қимыл басқармасының анонимді сенім телефондарына хабарлауға болады: күндізгі уақытта 60-80-47, 8 705 345 99 03 немесе 102 арнаға (тәулік бойы).
