Үйдің өртеніп жатқанын көрген ер адам өрт сөндірушілерге хабар беріп, олар келгенше жанып жатқан үйдің балалар бөлмесінен 2010, 2014 және 2018 жылы туған үш баланы шығарған, сондай-ақ үйде ұйықтап жатқан ата-аналарды эвакуациялауға көмектескен, екі газ баллонын тысқары алып шығып, өз бетімен өртті сөндіруге кіріскен.
Балаларды өрттің аузынан алып қалған қаһарман — олардың көршілері, Жаркент қаласы ПЧ-11 өрт сөндірушісі азаматтық қорғау бөлімінің кіші сержанты Еркебұлан Айтбаев Тұрғанұлы. Өрттің алдын ала себебі — қатты отынмен жұмыс істейтін пешті пайдалану кезінде өрт қауіпсіздігі ережелерін сақтамау.
Батыр азамат өзінің әрекетін батырлықпен байланыстырмайтынын айтады. Орнымда болған кез келген адам солай жасайтын еді, дейді ол.
«Кезекшіліктен тыс уақытта үйден шықсам, көршімнің үйін өрт шалғанын көрдім. Дереу жүгіріп барып, ұйықтап жатқан үш баласын қауіпсіз жерге алып шығып, әке-шешесіне сыртқа шығуға көмектестім. Және ас бөлмесінен екі газ баллонын байқап, сыртқа алып шықтым. Бұл ісімді мен ерлік деп санамаймын, өрт сөндірушілердің азаматтық борышы деп ойлаймын», — дейді Еркебұлан Айтбаев.
