Ерекше форматта қойылған спектальдің режиссері Дина Жұмабай бұл шығарманы бекер таңдамағанын айтады.
«Жабылу маусымына «Аты жоқ жұлдызды» қойған себебіміз халық дәл осы қойылымды көп сұрады. Драмада пластикалық қозғалыстар арқылы қазіргі қоғамның беталысын, қимыл, әрекетін бейнелеуді көздедік және бұл жоспарымыз ойдағыдай шықты», — деді Дина Жұмабай.
Михаил Себостянның драмасындағы оқиға дәулетті қоғамның Мона есімді ханымы кішігірім қалашыққа тап болуымен басталады. Ол кездейсоқ қарапайым астрономды кездестіріп, оның реңсіз өміріне көрік береді. Режиссер осы шығарма арқылы көрерменді материалдық құндылықтың құлы болмай, рухани байлықты бағалауға шақырады.
Басты ролдерді Ақерке Мұстафаева, Біржан Шошабаев, Мейіржан Нұров, Айгерім Бекболатова, Динара Махмет сомдады.
Аталған қойылым театрдың жалғыз премьерасы емес. Танымал театр әртістері биыл «Ана», «Аты жоқ жұлдыз», «Қара шекпен» атты жаңа қойылымдарды да сахналады. Қыркүйек айында театр жаңа маусым шымылдығын Бекен Римованың 100 жылдық мерейтойына орай танымал тұлға өзі жазған «Қос мұңлық» драмасымен арнап ашпақ.
