Қонаев қаласы жақында облыс орталығы мәртебесіне ие болды. Оның келбетін жандандыру бойынша ауқымды жұмыстар жүргізіліп, жаңа сәулет құрылыстары салынып жатыр. Оған мемлекет қомақты қаржы бөліп отыр, деп атап өтті прокуратура.
«Өкінішке орай, мүлікке қасақана зиян келтіру, оларды ұрлау және вандализм фактілері орын алып жатыр. Бұған мектеп жасындағы балалардың қатысуы алаңдаушылық туғызып отыр», — делінген прокуратура хабарламасында.
Мысалы, жақында 12 жастағы жасөспірім алаңдағы сәулет құрылымындағы жарықтандыруды әдейі сындырды. Бұл әрекеттер бейнебақылау камерасына түсіп қалып, жасаған адам анықталды. Жасөспірімнің ата-аналар жауапқа тартылды.
«Осыған байланысты 16 жасқа дейінгі балалар жасаған вандализм үшін әкімшілік құқық бұзушылық туралы кодекстің 448-бабы бойынша ата-аналарға айыппұл қарастырылғанын ескертеміз. Егер дәл осындай әрекеттерді ересек адам жасаса, онда қылмыстық кодекстің 294-бабы бойынша 40 тәулікке дейін қамауға алу қарастырылған», — деп еске салды аймақ прокуратурасы.
Қадағалау органы қалада ұсақ құқық бұзушылықтарға жол бермеу үшін жұртшылықты жұмылдыру қажет деп санайды.
«Сондықтан әрбір тұрғынды өзінің азаматтық ұстанымын көрсетіп, өзіміз қандай да бір құқық бұзушылық жасамауға және кез келген заң бұзушылықты байқаған жағдайда, ол туралы Алматы облысының құқық қорғау органдарына немесе прокуратура органдарына хабарлауға шақырамыз», — делінген хабарламада.
