Салтанатты шара аталған мемлекеттің тарихы мен мәдениетін бейнелейтін театрландырылған көрініспен басталды әрі жарты сағаттан астам уақытқа созылды.
Биылғы доп додасының ерекшелігі — алғаш рет қыс мезгілінде өтуі.
Сондай-ақ, биылғы әлем чемпионатында соңғы мәрте 32 құрама сынға түседі. Содан кейін доп додасында ол 48 құрамаға ұлғаймақ.
Биыл 22-мәрте өткізілетін доп додасы жөнінде шешім 2010 жылы Швейцарияның Цюрих қаласында қабылданды. Соңғы турда Қатар – 14, АҚШ 8 дауыс алып, осылайша шағын мемлекет 2022 жылғы Әлем чемпионатын өткізу құқығын иеленді.
Сәлден кейін әлем чемпионатындағы алғашқы кездесуде Қатар мен Эквадор құрамалары жасыл алаңға шығады. Ойын елорда уақытымен 21.50-де басталып, «Qazsport» телеарнасынан тікелей эфирде көрсетіледі.
Кездесу барысында итальяндық Даниэле Орсато бас төреші қызметін атқарады.
Ойындар 5 қалада орналасқан 8 стадионда болады. Қатар дүбірлі доданы ұйымдастыруға өтініш берген уақытта елде небәрі бір стадион бар болатын. Қазірге дейін жаңадан 7 стадион бой көтерді. Оған қоса 100-ден аса қонақүй мен қаншама шақырым жол салынды.
Бірқатар ақпарат көздерінде жарысты ұйымдастыруға 200 млрд доллар жұмсағаны айтылып жатыр. FIFA мәліметінше, Әлем кубогінің жүлде қоры — 440 млн доллар. Жеңімпаз тұғырына көтерілген құрама — 42, күміс жүлдегер — 30, 3-орын иегері 27 млн долларға қол жеткізеді. Ал 4-орын иегері — 25, 5-8 орын алғандардың әрқайсысы — 17, 9-16 орын аралығында болғаны — 13, 17-32 орындағылар 9 млн доллардан алады.
