Таңғы сағат 6:00-де 86 сайлау учаскесі ашылды. Оларға әскери бөлімдерде, шалғай және жетуі қиын аудандарда, алыстағы мал шаруашылығы учаскелерінде, демалыс үйлерінде, санаторийлерде, стационарлық емдеу-алдын алу мекемелерінде, тергеу изоляторлары мен уақытша ұстау изоляторларындағы азаматтар, сондай-ақ Қазақстанның шет мемлекеттердегі өкілдіктері жанындағы қызметшілер дауыс бере алады.
Бұл учаскелерде учаскелік сайлау комиссиясы тізімге енгізілген барлық сайлаушылар дауыс берсе, кез келген уақытта дауыс беру аяқталды деп жариялай алады.
Дауыс беру таңғы сағат 6:00-де басталатын 86 сайлау учаскесінің 47-сі тұрғылықты жерді уақытша ауыстырған азаматтар үшін жұмыс істейді.
Республика бойынша барлығы 10 101 сайлау учаскесі бар. Олардың басым бөлігі Батыс Қазақстан, Ақтөбе, Атырау, Маңғыстау және Қызылорда облыстары, Байқоңыр қаласынан басқасы (1 сағат айырмашылық бар) таңғы сағат 7:00-де ашылады.
Сайлау учаскелері сайлау күні жергілікті уақыт бойынша сағат 07:00-ден 20:00-ге дейін жұмыс істейді.
Шетелде жүрген Қазақстан азаматтары 53 елдегі 68 сайлау учаскесінде дауыс бере алады.
Қазақстанда президенттік сайлауға алты үміткер тіркелді. Олардың ішінде:
- «Халық коалициясынан» қазіргі Мемлекет басшысы Қасым-Жомарт Тоқаев;
- «Аманат» Қазақстан кәсіподақтары достастығынан экономист Мейрам Қажыкен;
- «Ауыл» халықтық-демократиялық патриоттық партиясынан Жигули Дайрабаев;
- «Кәсіби әлеуметтік қызметкерлердің ұлттық альянсы» республикалық қоғамдық бірлестігінен Қарақат Әбден;
- «Қазақ аналары – дәстүрге жол» республикалық қоғамдық бірлестігінен Салтанат Тұрсынбекова;
- оппозициялық Жалпыұлттық социал-демократиялық партияның елордалық филиалының жетекшісі Нұрлан Әуесбаев.
Сондай-ақ бюллетеньде «Барлығына қарсы» деген тармақ болады.
