16 қарашада кешкі уақытта Талдықорғанда белгісіз ер адамның 12 жастағы қызға тиіспек болған видеосы әлеуметтік желіге тараған. Полиция ер адамды анықтауға және ұстауға қатысты іс-шараларды дереу ұйымдастырған.
«Шабуыл сәті бейнебақылау камерасына түсіп қалған. Күдіктінің нақты белгілерінің бірі оның қызыл күртешесі болды. Жедел-іздестіру іс шаралары барысында полиция қызметкерлері күдіктіні анықтап, ұстады. Ол бұрын қылмыстық жауапкершілікке тартылмаған 38 жастағы жергілікті тұрғын болып шықты. Ер адам Талдықорған қаласының полиция бөліміне жеткізілді», — деді Жетісу облысты ПД бастығының орынбасары Ельдар Әбдікенов.
Ал күдікті арам ойы болмағанын айтады.
«Қызыл курткадағы менмін. Көшеде өтіп бара жатып, қызбен соғылып қалғаным рас. Қыздың әке-шешесінен, қала тұрғындарынан кешірім сұраймын», — дейді ол.
Аталған дерек бойынша ҚР ҚК 124-бабы (жас балаларды азғындық жолға түсіру) бойынша тергеу амалдары жүргізіліп жатыр. Ұсталған адамның басқа да қылмыстарға қатысы бар-жоғы тексерілетін болады.
Бұған дейін Талдықорғанда 12 жастағы қыз баланы аңдып, тиіспек болған ер адамның іздестіріліп жатқаны жайлы ақпарат бергенбіз.
