Аталған басқосу ТМД-ның халық шығармашылығы және мәдени мұрасы жылы аясында облыстық Қоғамдық келісім мемлекеттік мекемесінің ұйымдастыруымен өткізілді. Бұл шараның басты мақсаты – этносаралық татулықты насихаттау.
Шаһардағы көпсалалы колледж қабырғасында ұйымдастырылған бұл форумға түрлі этнос өкілдерінен құралған ұйымдардың мүшелері, студенттер, колледж ұстаздары қатысты.
Форумда ұлы ағартушылар жайлы эссе жазған студенттер марапатталды. Сонымен қатар әдебиетшілердің өмірінен сыр шертетін жәдігерлер мен жарық көрген кітаптарынан көрме қойылды.
«Мемлекет басшысы Қазақстан халқы Ассамблеясының биыл сәуірде өткен ХХХІ сессиясында бейбітшілік пен тұтастық – басты құндылығымыз екенін атап өтті. Бүгінгі ұйымдастырылған шара соның бір айғағы», — деді облыстық ішкі саясат басқармасына қарасты «Қоғамдық келісім» мекемесінің директоры Марат Илипов.
Ал көпсалалы колледждің директоры Әбуғалиева Айсәуленің айтуынша, бұл форум екі ұлттың ұлы ұстазы атанған тұлғалардың 150 жылдығына орай ұйымдастырылды.
«Олар өз заманында халықтың сауатты, білімді болуы жолында көп еңбек етті. Ахмет Байтұрсынұлы қазақ әліпбиін құрастырғанын бәріміз білеміз. Ал Христина Алчевская Украинада алғаш әйелдер мектебін, қарапайым шаруалардың отбасынан шыққан балалар үшін оқу ошақтарын ашқан тұлға», — деді колледж директоры.
