Іс-шараға өңірдегі денсаулық сақтау басқармасының басшысы, аурухананың бас дәрігері, медицина қызметкерлері қатысты.
Ең алдымен облыс әкімі көліктердің қалай жабдықталғанымен танысты.
«Бүгін 35 жедел жәрдем көлігі қолданысқа беріліп отыр. Оның ішінде, жетеуі Қонаев қаласында қалады. Қалғаны 9 ауданға жөнелтіледі. Бұл көліктер заманауи еуропалық стандарттарға сай келеді. Яғни, алғашқы көмек көрсетуге барлық жағдай жасалған», — деді өңір басшысы Марат Сұлтанғазиев.
Оның айтуынша, қазіргі таңда облыстағы 1,5 млн адамға 150-ден астам бригада қызмет көрсетеді.
«Жалпы біздің мақсатымыз — тұрғындардың медициналық қызметке қолжетімділігін арттыру. Біріншіден, айтулы күн құтты болсын! Екіншіден, жұмыстарыңызға табыс пен сәттілік тілеймін!», — деді облыс әкімі.
Ал облыстық денсаулық сақтау басқармасының басшысы Өмірзақ Ниязбековтің ақпаратына қарағанда, бір көліктің құны — 39-40 млн теңге шамасында. Аталған автокөліктер еліміздің «Лизинг» бағдарламасы бойынша сатып алынды. Мұнда ЭКГ, ИВЛ секілді алдыңғы қатарлы аппараттар орнатылған.
