Қазақстанның вице-премьері, коронавирусты таратпау жөніндегі ведомствоаралық комиссияның басшысы Ералы Тоғжанов, коронавируспен ауыратын науқастардың саны көбейсе, маска режимі қайтадан енгізілетінін жоққа шығармады, деп хабарлады агенттік Sputnik.kz.
«Вакцинация – бұл басты мәселе, әзірге қиын жағдай жоқ. Бірақ маска режимі індеттің белсенділігі мен науқастар санының өсуі жағдайында қайтарылуы мүмкін. Қазір тәулігіне 100 адамнан тіркеліп жатыр. Карантин шараларын күшейту мәселелерін біз ВАК отырысына шығарамыз. Маскаға ғана емес, жалпы шараларға да қатысты», — деді Ералы Тоғжанов.
Бұған дейін денсаулық сақтау вице-министрі — Қазақстанның Бас мемлекеттік санитарлық дәрігері Айжан Есмағамбетова сырқаттанғандар саны көбейгені туралы хабарлаған болатын. 29 маусымда коронавирустық инфекцияның 137 жаңа жағдайы тіркелді, олардың көпшілігі Алматыда — 77 және Нұр-Сұлтанда — 26. Бұл 2022 жылдың наурызынан бергі ең жоғары көрсеткіш.
Коронавируспен ауырған қазақстандықтардың көпшілігі вакцинация немесе ревакцинацияның толық курсынан өте алмағандар немесе екпе алғандарына алты айдан астам уақыт өткендер.
