Министр Қазақстан агроөнеркәсібіндегі тәжірибемен танысу үшін Кеген ауданы Тасашы ауылдық округіндегі «Казмясо» ЖШС-не ат басын бұрды.
Шетелдік министрден бөлек, серіктестіктің тыныс-тіршілігімен облыс әкімінің орынбасары Рауан Рақымбеков, облыстық ауылшаруашылығы басқармасының басшысы Дастан Құдабаев, Кеген ауданының әкімі Талғат Байедилов танысты.
«Біздің шаруашылықта Абердин Ангус асыл тұқымды етті ірі қара малы өсіріледі. Мұнда жалпы саны 5000 іріқара бар. Оның ішінде 2500 басы — сиыр. Биыл олардан 1200 бұзау алдық», — деді мал шаруашылығы басшысы Төлеген Бозжанов.
Оның айтуынша, бұл жердегі іріқара мал Еңбекшіқазақ ауданына қарасты Қырбалтабай ауылдық өңіріндегі бордақылау алаңына жеткізіліп, семірген мал шетінен сойылады. Ары қарай ет өңдеу комбинаттарына жөнелтіледі. Бірнеше өндірістік кезеңнен өткен шұжық, туралған ет сияқты дайын өнімдер тұтынушыларға жол тартады.
«Серіктестіктің 4273 га егістік, 920 га шабындық, 11082 га жайылым жері бар. Мұнда 70 адам еңбекпен қамтылған. Олардың орташа еңбекақысы — 150 мың теңге», — деді шаруабасы.
Шаруашылықтың жұмысымен танысқан мамандар Төлеген Бозжановқа сәттілік тілеп, алғыс айтты.
