«15 жастағы қазақ қызы өзінен үлкен 18 жастағы және 26 жастағы қарсыластарын тізе бүктірді. Бұл Жібектің ересектер арасына шығып күш сынасқан алғашқы жарысы», — дейді жаттықтырушы Нұрсұлтан Орынбасаров.
Сағадат Нұрмағамбетов атындағы клубтың бас бапкері Нұрсұлтан Орынбасаров турнирге Жібек Құлымбетовадан бөлек тағы үш спортшының қатысқанын айтты.
«Олардың барлығы мықты қарсыластармен сынға түсті. Жасыл белбеу иегерлері арасынан шәкіртіміз Нұрай Алтынбек екінші орын алса, қара белбеу иегері Самат Айтпанбет, өкінішке орай, жарақатына байланысты жеңіліп қалды. Қоңыр белбеу иегері Мақсат Мұратұлы да күміс жүлдегер атанды», – дейді бапкер.
Ал Жібек Құлымбетова – Алматы облысы Іле ауданындағы Сағадат Нұрмағамбетов атындағы «Сағадат батыр -QTT» спорт клубының тәрбиеленушісі. Ол Абу-Дабиде джиу-джитсудан төрт дүркін әлем чемпионы және Мәскеуде өткен грэпплингтен әлем чемпионатының жеңімпазы.
«Жалпы бүл спортпен айналысқаныма 5 жылдан асты. Мен жасы үлкен спортшылармен жарысып, екі жекпе-жек өткізіп, екеуінде де жеңіске жеттім. Әрине қиындық болды. Қазір мен күлгін белбеу турнирінің жеңімпазымын. Қолдау, тілектері үшін бәріне мың алғыс. Бапкерім Нұрсұлтан Орынбасаровқа ерекше алғыс айтамын», — дейді Жібек Құлымбетова.
