Шамалған станциясында «Алматы-Ақтөбе» бағытында жүретін жолаушылар пойызы белгіленбеген жерде темір жолдан өтіп бара жатқан ер адамды қағып кеткен.
«Ол алған жарақаттары салдарынан оқиға орнында қайтыс болды. Аталған дерек бойынша «абайсызда адам өліміне әкеп соқтырған қозғалыс қауіпсіздігі немесе теміржол көлігін пайдалану ережелерін бұзу» (ҚР ҚК 344-бабы 2-бөлігіне) сәйкес қылмыстық іс қозғалып, сотқа дейінгі тергеу амалдары жүргізіліп жатыр», – делінген ведомство хабарламасында.
Көліктегі полиция департаментінен түскен мәліметке қарағанда, биылғы тоғыз айда белгіленбеген орындарда темір жолды кесіп өткен 34 019 адам әкімшілік жауапкершілікке тартылды.
Сондай-ақ жыл басынан бері 72 адам пойыздың астына түссе, соның тең жартысынан астамы көз жұмды. Соның ішінде 10 дерек бойынша балалар зардап шегіп, 8-і мерт болды.
