Аталған тексеріс 2019 жылдан бері жүргізілген. Нәтижесінде казинолардың бірқатар заңсыз әрекеттері әшкере болды.
Қазіргі таңда облыстық прокуратураның талабы бойынша салық саласының мамандары жоспардан тыс тексеріс жүргізіп жатыр.
«Ойын автоматтары бар бүкіл залдарда қонақтардың ұтқан ақшасының пайызын дұрыс өтемеу фактісі тіркелді. ҚР «Ойын бизнесі туралы» Заңының 12-бабы 6-бөлігі бойынша қонақтар ұтыстың 95 пайызын алуы керек, сәйкесінше, ойынхана 5% алуға құқылы», — дейді облыстық прокуратураның баспасөз хатшысы Мақсат Абиров.
Оның айтуынша, ойынхананың үлесіне ұтыстың 25-30% не 50% қалып отырған.
«Тексеріс барысында ойын бизнесімен айналысатындардың қалтасында 2,6 млрд теңге қалғаны анықталды. Бұл қаржы қонақтардың жеңген кезінде берілуі керек болған», — деді баспасөз хатшысы өз сөзінде.
Мақсат Абировтың ұсынған ресми ақпаратына сүйенсек, бүгінгі таңда туризм индустриясы комитеті казинолардың ісін ҚР ӘҚБтК-тің 445-бабына сәйкес қарастырып жатыр. Аталған баптың санкциясы бойынша ойынхананың кіріс қаражаты тәркіленеді және кәсіптің лицензиясы алынады.
«Слот залдардың бірінде Қазақстанда тыйым салынған интернет-казино қызметі анықталды. Бұл жайт ҚР ҚК-нің 307-бабы бойынша тіркеліп, сотқа дейінгі тергеп-тексеру жүргізілу үстінде», — деді Мақсат Абиров.
Сондай-ақ ол санитарлық-эпидемиялық нормалардың және өрт қауіпсіздігі ережелерінің сақталмауы секілді бірқатар келеңсіздіктердің анықталғанын айтты.
