Алматы облысының әкімі Марат Сұлтанғазиев бейсенбі күні Жамбыл ауданының тұрғындарымен кездесті. Кездесу барысында ауыл азаматтары жайылымдардың жетіспеушілігі мәселесін көтерді.
Тұрғындардың бірі пайдаланылмаған жерлерді мемлекет меншігіне қайтарып, одан кейін қайта таратуды ұсынды.
Әкім өңірде жер ревизиясы жүргізілгенін, одан кейін билік қажетті шаралар қабылдайтынын атап өтті.
«Пайдаланылмай жатқан ауылшаруашылығы мақсатындағы жерлерді қайтару және оларды ұтымды пайдалану бойынша жұмыстар өз жалғасын табады. Сондай-ақ нысаналы мақсатын негізсіз өзгертуге жол бермеу бойынша жұмыстар жүргізілуде», — деді өңір басшысы.
Мониторинг көрсеткендей, өңірде ауылшаруашылығы мақсатындағы пайдаланылмай жатқан 586 мың.гектар жер анықталған.
