Жәрмеңкеде техникалық оңалту құралдары, атап айтқанда арба, протезді-ортопедиялық құрылғылар, жөргектер және өзге де қажетті тауарды сатып алуға немесе әлеуметтік портал арқылы тапсырыс беруге мүмкіндік болды.
Бұл шараға мүгедектердің қоғамдық бірлестіктері, мүмкіндігі шектеулі азаматтар және Жетісу облысының жұмыспен қамтуды үйлестіру және әлеуметтік бағдарламалар басқармасының басшысы Маржан Мұрат, әлеуметтік қызмет порталындағы өнім берушілер қатысып, түрлі мекемелердің тауарларымен танысты.
Атап айтқанда, Талғар қаласынан «Medicare international» ЖШС протезді ортопедия орталығы, Алматы қаласынан «Республикалық протезді ортопедиялық орталық» АҚ, Нұр-Сұлтан қаласынан «Dosortopedia» ортопедиялық тауар дүкенінің өкілдері, «Еvony Joli» жөргегі, «Molfix» балалар жөргегін сататын «Көктем» ЖШС, «Асар» фитнес орталығы және «Gulsar» ЖК өкілдері қатысып, өз тауарлары мен қызметтерін ұсынды.
Мұндай бағыттағы жәрмеңке республика және өңір көлемінде алғаш рет ұйымдастырылып отыр. Бұған дейін өздеріне қажетті заттарды әлеуметтік портал арқылы тек компьютерден көріп сатып алу мүмкіндігі ғана болған. Жәрмеңке арқылы мүгедектігі бар жандар тауарларды көріп, таңдап, әрі сапасын бағалауға мүмкіндік алды.
Бұл шараны ұйымдастырудағы басты мақсат – жергілікті атқарушы билік органдары, өнім берушілер мен мүгедектігі бар азаматтармен екі жақты байланысты нығайту. Сондай-ақ мүмкіндігі шектеулі жандардың өмір сүру сапасын жақсарту.
