Облыстық ТЖД-нің мәліметінше, осы уақытқа дейін таулы аймақтағы «Кендір Сақал» учаскесіне тік ұшақтармен 84 тонна су төгілді.
«Аталған аймақтағы өрт 8 қыркүйекте басталды. Кеше таңертең өрт ошақтарын анықтау үшін МИ-171 тікұшағымен комиссиялық бақылау жүргізілді. Шамамен 70 гектар аумақта 10 жердің бықсып жатқаны анықталды», — делінген облыстық ТЖД-нің баспасөз мәліметінде.
Ресми мәліметке сүйенсек, өртті сөндіруге 232 адам, 2 тікұшақ, 26 техника, 60 аспалы бүріккіш және 11 жылқы жұмылдырылды.
Бұдан бөлек, өрт сөндірушілер Үйгентас орман шаруашылығына тиесілі «Қаралы» аумағындағы тілсіз жаумен күресіп жатыр. Өрттің аумағы 100 гектарды қамтыды.
Айта кетейік, 8 қыркүйектен 9 қыркүйекке қараған түні «Кендір Сақалдағы» өрт ҚХР жеріне өтті. Тілсіз жау Қытай өрт сөндірушілерінің көмегімен ауыздықталды.
