Баспасөз қызметінің ақпаратына қарағанда, бүгін сағат 11:39-да ТЖД-не өрт туралы хабар жетті. Тілсіз жау Алматы-Өскемен тас жолы бойындағы (Қонаевқа 1 шақырым жақын) қоқыс алаңын шарпыды.
«Өрт 1 гектар аумақты қамтыды. Аталған қоқыс алаңы Қонаев қаласы ТКШ бөлімінің теңгерімінде. Полигонның жалпы ауданы 5 гектар жерді алып жатыр. Өртті сөндіруге ТЖД-нің 3 техникасы, 8 қызметкері және жергілікті атқарушы органдардың 4 техникасы мен 4 қызметкері жұмылдырылды», — дейді ТЖД баспасөз хатшысы Гүлмира Әбілқасымова.
Оның айтуынша, қазіргі таңда өрт ауыздықталды. Қаза тапқандар мен зардап шеккендер жоқ. Қалалық ТКШ бөлімі қызметкерлері қоқыстың өртенген жеріне топырақ төкті. Әзірше өрттің неден пайда болғаны белгісіз.
