Бұл жайында ТЖМ баспасөз қызметі ақпарат таратты. Баспасөз қызметінің хабарлауынша, кеше Жарма ауданында құрғақ шөп өртенді. Тілсіз жаумен күресу үшін оқиға орнына Әуезов кентінен №22 өрт сөндіруші жасағы келді.
Өртеніп жатқан аумаққа келген құтқарушылар көлік цистернасын су тасығыш көліктегі сумен толтыра бастаған. Жел бағытының өзгеру әсерінен өрт цистернаға қарай беттеген. Екі метрлі қарағайларды жалын шарпығаннан көлікті эвакуациялау мүмкін болмаған.
Құтқарушылар жедел эвакуацияға кіріскенімен, цистерна мен су таситын көлік түгі қалмай жанып кетті. Бөлім командирі Амангелді Тұрлыбековтың, жасақтың көлік жүргізушісі Айдос Тоғызбаевтың, құтқарушы Сәлімжан Нұрланның денесін түрлі деңгейдегі күйік шалып, ауруханаға жеткізілді. Өкінішке орай, жарақат алған Айдос ауруханада көз жұмды. Оның жасы 36-да, артында әйелі мен 5 баласы қалды. Төтенше жағдай министрлігі оның жақындары мен туған-туыстарына көңіл айтты.
Айта кетейік, өрт аумағы 500 гектарды құрады, өрт 8 қыркүйекте сағат 5:40-та сөндірілді. Өртті сөндіруге ТЖД мен жергілікті атқарушы органдардың жеке құрамынан 14 адам мен 5 техника жұмылдырылды.
