«Қапшағай су қоймасында үш адамды құтқару кезінде көрсеткен батылдығы мен ерлігі үшін Александр Ананиев «Суға батқандарды құтқарғаны үшін медалімен марапатталды», — деп хабарлады Алматы облысы ТЖ департаментінің баспасөз қызметі.
Медальді Алматы облысы ТЖД және өрт сөндіру қызметі жеке құрамның салтанатты сапының алдында тапсырды. 53 жастағы алматылықтың әрекеті туралы ақпарат әлеуметтік желілерде пайда болған. 29 шілде күні ер адам балаларымен және немерелерімен Қапшағай қаласына шомылуға келген. Жағада жүзіп жүрген ер адам үрмелі баллоннан ұстап алған баланың айқайлап жылаған даусын естиді. Ол суға батып бара жатқан үш қызды көрген. Александр үшеуін де судан шығарып алады.
«Екеуін құтқарып тұрып, үшіншісінің суға батып бара жатқанын көрдім. Өйткені ол қимылсыз қалды. Дәл қазір құтқармасам тереңге батып кететінін бірден түсіндім. Үрмелі баллондағы бала жылап назар аудармағанда бұл оқиға қайғылы аяқталар еді», — деді Александр.
