Бүгін жұртшылық заң жобасында баяндалған «Қазақстан Республикасының Конституциясына өзгерістер мен толықтыруларды қабылдайсыз ба?» деген сауалға жауап беріп, ел келешегінің даму жолын айқындайды.
Заңға сәйкес таңғы сағат 7-де референдумның барлық аумақтық және учаскелік комиссиялары жұмысын бастады. Келушілер қарасы қалың. Дауыс беретін орындар есігін келушілерге айқара ашты. Сайлаушылардың еш кедергісіз өз таңдауын білдіруіне барынша мүмкіндік жасалған.
Облыс бойынша жалпы саны 1053 референдумға дауыс беру учаскесі бар. Соның 58-і Талдықорған қаласында.
«Қалада барлық сайлау учаскесі өз жұмысын бастады. Оның төртеуі (ауруханалар мен әскери бөлім, т.с.с) жабық түрде ұйымдастырылған. Жалпы саяси науқанға қала бойынша 130 мыңға жуық сайлаушы қатысып, өз таңдау жасайды деп болжанып отыр», – деді референдум өткізу жөніндегі қалалық комиссиясының хатшысы Маржан Меліс.
Айта кетсек, облыс бойынша 1 млн 390 мыңнан астам тұрғын өз таңдауын жасайды.
