Модульді мектеп төрт айдың ішінде салынған. Оның жалпы аумағы 1561,09 шаршы метр. Мектепте 14 кабинет, спорт және акт залдары, кітапхана, асхана, коворкинг-аймақтар, ойын алаңдары бар және сапалы оқыту үшін барлық қажетті жабдықтармен қамтылған. Химия және информатика, зертханалық сыныптары жаңа жабдықтармен толықтырылған. Ғимараттың ішкі дизайны елордалық BINOM мекемелеріне ұқсайды. Мектеп жер сілкінісі мен түрлі апаттық жағдайларға төзімді. Мұндай жобалар ТМД-да көп емес. Қазақстанда екеу бар. Біреуі Ақмола облысында, екіншісі осы Көкдала ауылында салынды. Көкдала ауылында осыған дейін оқушылар бастауыш мектепті бітірген соң көршілес Ақсеңгір ауылына автобуспен тасымалданатын.
«Бүгін біздің қуанышымызда шек жоқ. Осы мектепті ауыл болып көптен бері күттік. Немерелерім ескі бастауыш мектепте оқитын еді. Енді мынадай жаңа мектепте білім алады», — деді ауыл ақсақалы Өмірбай Өмірзақов.
Айта кетейік, бүгінде Жамбыл ауданында 35 мыңға жуық оқушы бар. Жыл сайын 4000-нан астам бүлдіршін мектеп табалдырығын аттайды. Ауданда 62 мектептің 10-ы үш ауысымда білім алып жатыр. 10 мектептің бірі осы Көкдала бастауыш мектебі болған.
