Іле ауданы – халық саны өсіп, тұрғын үй құрылысы қарқынды жүріп жатқан өңірлердің бірі. Жаңа тұрғын үй алаптарының пайда болуы мен елді мекендердің кеңеюі жол инфрақұрылымына түсетін жүктемені арттырып отыр. Осыған байланысты ауданда жолдарды жаңарту және асфальт төселмеген көшелерді кезең-кезеңімен жөндеу жұмыстарына басымдық берілген.
Аудан әкімінің мәліметінше, соңғы үш жылда жол жөндеу жұмыстарының көлемі айтарлықтай ұлғайған. Мәселен, 2024 жылы 46 көше жөнделсе, 2025 жылы бұл көрсеткіш 91-ге жеткен. Ал биыл 107 көше жаңартылып, жоспарланған жұмыстар толық аяқталды.
2026 жылы жол инфрақұрылымын дамытуға 3,1 млрд теңге бөлінген. Бұл қаражатқа жалпы ұзындығы 77,1 шақырым болатын жол жөнделді. Осылайша, 2024 жылмен салыстырғанда жыл сайын жөнделетін көшелер саны екі еседен астам артқан.
Ауданда жолдарды жаңарту қарқыны алдағы жылы да бәсеңдемейді. 2027 жылы жалпы ұзындығы 95 шақырымды құрайтын 150 көшеге асфальт төсеу жоспарланған. Бұл мақсатқа шамамен 5 млрд теңге бөлу көзделіп отыр.
«Жолдың сапасы тұрғындардың күнделікті өміріне тікелей әсер етеді. Сондықтан бұл мәселеге ерекше көңіл бөліп келеміз. Егер 2024 жылы 46 көшені жөндесек, биыл 107 көшеге жеттік. Келесі жылы 150 көшені қамтуды жоспарлап отырмыз. Әрине, аудандағы барлық жол мәселесі шешілді деп айта алмаймыз. Әлі де жөндеуді қажет ететін көшелер бар. Сол себепті жұмыстарды тұрғындардың өтініштері мен қажеттіліктерін ескере отырып жалғастырамыз», – деді Қайыржан Жақсымбетов.
Аудан басшысы жол жөндеу жұмыстары тұрғындардың сұранысы мен елді мекендердің қажеттілігіне қарай жүргізілетінін атап өтті. Әсіресе халық тығыз орналасқан және жаңа тұрғын үй құрылысы жүріп жатқан аумақтарда жол инфрақұрылымын дамыту өзекті болып отыр.
Жол сапасын жақсарту тұрғындардың күнделікті қатынауын жеңілдетіп қана қоймай, елді мекендер арасындағы көлік байланысын нығайтуға да мүмкіндік береді. Сонымен қатар жаңартылған жолдар қоғамдық көліктің қозғалысына, жедел қызметтердің қолжетімділігіне және тұрғындардың қауіпсіздігіне оң әсер етеді.
Алдағы уақытта Іле ауданында асфальт төселмеген көшелерді кезең-кезеңімен қамту және қолданыстағы жолдардың сапасын жақсарту жұмыстары жалғасады. Жергілікті билік жол инфрақұрылымын дамытуда тұрғындардан түскен өтініштер мен елді мекендердің даму қарқынын ескеруді жоспарлап отыр.
