Жаңа сауда павильонының ашылу рәсіміне Алматы облысының әкімі Шыңғыс Әрінов қатысып, нысанның өңір экономикасы мен тұрғындар үшін маңыздылығына тоқталды. Облыс басшысының айтуынша, ауыл шаруашылығы өндірісі дамыған өңір үшін өнім көлемін арттырумен қатар, оны сақтау, тасымалдау және тұтынушыға қолжетімді бағамен жеткізу мәселесі де өзекті.
«Алматы облысы – ауыл шаруашылығы өндірісі дамыған өңір. Облысымызда егін және мал шаруашылығы өнімдерінің мол көлемі өндіріледі. Сондықтан біз үшін өнім өндірумен қатар, оны сақтаудың және тұтынушыға тікелей жеткізудің тиімді жүйесін қалыптастыру маңызды. Мемлекет басшысы Қасым-Жомарт Тоқаев Жолдауында ауыл шаруашылығы өнімдерін сақтау мен сату жүйесін жетілдіру, логистикалық тізбектерді оңтайландыру және негізсіз делдалдықты жою міндетін жүктеді. Ашылып отырған жаңа павильон осы басымдықтармен толық үндеседі», – деді Шыңғыс Әрінов.
«Алмалы өнімдері» павильонының басты ерекшелігі жергілікті ауыл шаруашылығы тауарын өндірушілерге өз өнімдерін тікелей саудалауға мүмкіндік берілуі. Мұнда тұрғындар ет, сүт өнімдерін, көкөніс және басқа да күнделікті тұтынатын азық-түлік түрлерін сатып ала алады. Ұйымдастырушылардың мәліметінше, өнім бағасы нарықтағы орташа бағадан 10–15 пайызға төмен болады. Мұндай сауда үлгісі шаруалар мен тұтынушылар арасындағы делдалдар санын азайтуға бағытталған. Нәтижесінде фермерлер өнімін тікелей өткізу мүмкіндігіне ие болса, тұрғындар жергілікті азық-түлікті тиімді бағамен сатып ала алады.
Бұл әсіресе күнделікті тұтынатын азық-түлік бағасы отбасылық бюджетке тікелей әсер ететін қазіргі жағдайда маңызды.
Жеке инвестиция есебінен салынған жаңа сауда нысанында 40-қа жуық сауда орны жабдықталған.
Облыс әкімдігінің мәліметінше, павильон заманауи талаптар мен санитарлық нормаларға сай салынған. Мұнда жергілікті кәсіпкерлер мен ауыл шаруашылығы өнімдерін өндірушілерге өз тауарларын сатуға жағдай жасалған.
Жаңа нысанның іске қосылуы шағын және орта кәсіпкерліктің дамуына, жергілікті өнімдердің өткізу нарығын кеңейтуге және қосымша жұмыс орындарын ашуға ықпал етеді деп күтілуде.
Сонымен қатар павильон фермерлер үшін тұрақты сауда алаңын қалыптастыруға мүмкіндік береді. Өйткені ауыл шаруашылығы саласында өнім өндірумен қатар, оны тиімді өткізу де шаруалардың табысына әсер ететін маңызды факторлардың бірі.
Алматы облысы еліміздегі ауыл шаруашылығы әлеуеті жоғары өңірлердің бірі саналады. Мұнда егіншілік пен мал шаруашылығы қатар дамып, ішкі нарықты азық-түлікпен қамтамасыз етуге үлес қосып келеді. Дегенмен ауыл шаруашылығы өнімдерінің тұтынушыға жеткенге дейін бірнеше делдал арқылы өтуі оның түпкілікті бағасына әсер етуі мүмкін. Сондықтан өндіруші мен сатып алушы арасында тікелей байланыс орнататын сауда орындарын дамыту маңызды. Осы тұрғыдан алғанда, Қонаев қаласында ашылған «Алмалы өнімдері» павильоны жергілікті фермерлерді қолдау мен тұрғындарға қолжетімді азық-түлік ұсынуды ұштастыратын бастама болмақ.
Жаңа сауда нысанының жұмысы өңірдегі сауда-логистика жүйесін жетілдіруге, отандық өнімнің нарықтағы үлесін арттыруға және азық-түлік қауіпсіздігін нығайтуға бағытталған.
