Ауқымды тазалық шараларына 911 мыңнан астам тұрғын қатысып, өңір аумағынан 20 мың тоннадан астам қоқыс шығарылды.
Алматы облысында қоршаған ортаны қорғау, елді мекендердің санитарлық жағдайын жақсарту және тұрғындар арасында экологиялық мәдениетті қалыптастыру бағытындағы жұмыстар жүйелі түрде жалғасып келеді. «Таза Қазақстан» бағдарламасы аясында ұйымдастырылған сенбіліктер өңір тұрғындарын ортақ іске жұмылдырып, табиғатқа жанашырлық танытудың маңызды алаңына айналды.
Облыс әкімдігінің мәліметінше, биыл жыл басынан бері өңірде 37 жалпыхалықтық сенбілік өткізілген. Оған мемлекеттік мекемелердің қызметкерлері, мәслихат депутаттары, қоғам белсенділері, жастар ұйымдары, еріктілер, шағын және орта бизнес өкілдері мен жергілікті тұрғындар белсенді қатысқан.
Экологиялық акциялар барысында облыс аумағында ауқымды тазалық және көгалдандыру жұмыстары жүргізілді. Атап айтқанда, сенбіліктерге жалпы саны 911 312 адам қатысып, 20 877 тонна тұрмыстық және өзге де қалдық шығарылған.
Сонымен қатар 12 940 гектар аумақ қоқыстан тазартылып, 124 781 түп ағаш отырғызылды. Тазалық жұмыстарын тиімді ұйымдастыру үшін 5 289 техника жұмылдырылған.
Бұл көрсеткіштер өңірде экологиялық бастамалардың кең қолдау тауып отырғанын және қоршаған ортаны қорғау ісіне тұрғындардың белсенді араласып жатқанын аңғартады.
31 қазанда Алматы облысында кезекті жалпыхалықтық сенбілік өтті. Экологиялық акция аясында елді мекендердің көшелері, қоғамдық орындар мен басқа да аумақтар тазартылып, абаттандыру жұмыстары жүргізілді.
Күзгі тазалық шарасына 28 971 адам қатысып, бір күннің ішінде 444 тонна қоқыс шығарылды. Сондай-ақ 485 гектар аумақ тазартылды.
Сенбілік барысында қалдықтардың жекелеген түрлерін жинау және сұрыптау жұмыстарына да назар аударылды. Жиналған қалдықтардың бір бөлігі кейіннен қайта өңдеуге жіберу үшін сұрыпталды.
«Таза Қазақстан» бастамасы елді мекендерді қоқыстан тазартумен ғана шектелмейді. Бағдарламаның негізгі мақсаты – тұрғындардың қоршаған ортаға деген жауапкершілігін арттыру, табиғатты аялау мәдениетін қалыптастыру және қоғамдық кеңістіктердің тазалығын сақтауды күнделікті өмір салтына айналдыру.
Бұл бағытта мемлекеттік органдармен қатар, азаматтық қоғам өкілдерінің, кәсіпкерлер мен еріктілердің белсенділігі ерекше маңызға ие.
Алматы облысында жыл басынан бері атқарылған жұмыстар экологиялық мәселелерді шешуде қоғамның бірлескен күш-жігері маңызды екенін көрсетеді.
Таза көше, көрікті ауыл мен жасыл желекке оранған елді мекен – бір күндік сенбіліктің ғана емес, әр тұрғынның табиғатқа деген жанашырлығы мен жауапкершілігінің нәтижесі.
