Бұл жетістік Қазақстанның туристік әлеуетін халықаралық деңгейде танытып, отандық демалыс орындарының бәсекеге қабілеттілігін тағы бір мәрте дәлелдеді. ҚР Туризм және спорт министрлігінің мәліметінше, беделді салалық марапат тау шаңғысы индустриясының өкілдерін біріктіретін Туристік аумақтар форумы (FTT) аясында табысталған.
Ski Business Awards – тау курорттары мен туристік кешендердің даму деңгейін бағалайтын халықаралық салалық байқау. Онда инфрақұрылымды жетілдіру, заманауи технологияларды енгізу, туристерге көрсетілетін қызмет сапасын арттыру және инновациялық шешімдерді жүзеге асыру бағытында жоғары нәтижеге қол жеткізген нысандар марапатталады.
Алматы облысындағы Oi-Qaragai курортының халықаралық деңгейде мойындалуы кездейсоқ емес. Туристік кешен бұған дейін де бірқатар беделді марапатқа ие болған. Атап айтқанда, «Үздік IT-шешім» және «Балалар лагерінің үздік бағдарламасы» аталымдары бойынша жеңімпаз атанған. Ал 2025 жылы маркетинг саласындағы жетістіктері үшін арнайы марапатқа ие болды.
Қазіргі уақытта Алматы облысында Oi-Qaragai тау курортын кеңейтуге бағытталған ауқымды инвестициялық жоба жүзеге асырылып жатыр. Жобаның жалпы құны 53,2 миллиард теңгені құрайды. Қаражат толығымен жеке инвестициялар есебінен бөлінеді. Құрылыс және инфрақұрылымды дамыту жұмыстарын 2028 жылға дейін аяқтау жоспарланған. Жоба аясында курорттың туристерді қабылдау мүмкіндігі кеңейіп, демалыс пен қызмет көрсету инфрақұрылымы жетілдіріледі. Бұл келушілерге қолайлы жағдай жасап қана қоймай, өңірдің туристік тартымдылығын арттыруға мүмкіндік береді.
Сонымен қатар инвестициялық жобаның жүзеге асырылуы нәтижесінде 1200-ге дейін жаңа жұмыс орны ашылады деп күтілуде. Бұл жергілікті тұрғындарды жұмыспен қамтуға және өңір экономикасының дамуына оң ықпал етпек.
Алматы облысы еліміздегі тау және экологиялық туризмді дамытуға қолайлы өңірлердің бірі саналады. Аймақтың табиғи ерекшеліктері, тау бөктеріндегі демалыс орындары мен туристік бағыттары жыл сайын отандық және шетелдік саяхатшылардың қызығушылығын арттырып келеді.
