Алматы облысында Қапшағай су қоймасының жағалауындағы қамыс алқабын шарпыған өртті сөндіру жұмыстары жалғасуда. Оқиға орнына төтенше жағдайлар қызметінің бөлімшелері мен арнайы техника жіберілген. Өрттің ауқымын анықтап, құтқарушылардың жұмысын үйлестіру үшін Алматы облысы Төтенше жағдайлар департаментінің бастығы оқиға орнына арнайы барды. Жол қатынасының қиындығына байланысты ол су қоймасы арқылы моторлы қайықпен жеткен. Оқиға орнында жүргізілген барлау жұмыстарының нәтижесінде бес өрт ошағы анықталды. Осыған байланысты өртті сөндірудің басым бағыттары белгіленіп, құтқарушылардың күштері мен құралдарын орналастыру тәртібі нақтыланды.
Қазіргі уақытта төтенше жағдайлар қызметінің мамандары анықталған өрт ошақтарын сөндіру жұмыстарын жүргізіп жатыр. Алайда өрт шыққан аумақтың географиялық ерекшеліктері құтқарушылардың жұмысын қиындатуда. Атап айтқанда, жер бедерінің күрделілігі мен жол жағдайының қолайсыздығы арнайы техниканың өрт ошақтарына жетуіне кедергі келтіріп отыр. Сонымен қатар желдің әсері мен қараңғылықтың түсуі де өртті сөндіру жұмыстарына қосымша қиындық туғызуда. Соған қарамастан, төтенше жағдайлар қызметінің бөлімшелері өрт ошақтарын сөндіруді жалғастырып жатыр.
Алдын ала мәлімет бойынша, Қапшағай су қоймасының жағалауында шыққан өрт жақын маңдағы елді мекендер мен құрылыстарға қауіп төндіріп тұрған жоқ.
