Мерекелік іс-шараға қатысқан қала әкімі Асхат Бердіханов құтқарушыларды кәсіби мерекесімен құттықтап, олардың қоғам қауіпсіздігін қамтамасыз етудегі жауапты қызметіне ерекше тоқталды.
Қала басшысы құтқарушы мамандығының батылдықты, төзімділік пен жоғары кәсіби дайындықты талап ететінін атап өтті. Оның айтуынша, төтенше жағдай кезінде өзгелердің өмірін арашалау үшін өз қауіпсіздігін қатерге тігетін мамандардың еңбегі әрдайым құрметке лайық.
«Құтқарушы болу – үлкен жауапкершілікті, батылдық пен табандылықты талап ететін абыройлы мамандық. Сіздер күн сайын адам өмірі мен қауіпсіздігін қорғап, қиын сәтте көмекке келіп, талай жанға үміт сыйлап жүрсіздер. Қауіп-қатерге қарамастан, азаматтардың өмірін сақтап қалу жолындағы қызметтеріңіз әрдайым құрметке лайық», – деді Асхат Бердіханов.
Салтанатты жиын барысында Қонаев қаласының Төтенше жағдайлар басқармасы мен №1 өрт сөндіру бөлімінің 15 қызметкері кәсіби міндеттерін адал атқарғаны үшін марапатталды.
Сонымен қатар «Халық үшін» қоғамдық қорының директоры Сергей Горяной тағы бес құтқарушыға арнайы сертификат табыстады. Қала әкімі төтенше жағдайлар қызметінің мамандарына тұрғындар атынан алғыс білдіріп, олардың отбасыларына амандық, еңбектеріне табыс тіледі.
Айта кетейік, құтқарушылар табиғи апаттар, өрт және өзге де төтенше жағдайлар кезінде тұрғындарға жедел көмек көрсетіп, адам өмірі мен мүлкін қорғау бағытында маңызды міндеттер атқарады.
