Мәдени шара Баққожа Мұқай атындағы аудандық Мәдениет үйінде ұйымдастырылды. Байқау аясында ауданның өнер ұжымдары, қолөнер шеберлері мен шығармашылық өкілдері бас қосып, ұлттық мәдениеттің сан қырын таныстырды. Іс-шара қонақтардың ұлттық қолөнер бұйымдары мен шығармашылық жұмыстар қойылған көрмені тамашалауынан басталды. Көрмеге қазақ халқының тұрмыс-тіршілігін, салт-дәстүрі мен дүниетанымын бейнелейтін туындылар ұсынылды. Ағаштан жасалған бұйымдар, ұлттық ою-өрнектермен безендірілген қолөнер үлгілері жергілікті шеберлердің шығармашылық ізденісін көрсетті.
Мерекелік бағдарламаның шымылдығын Райымбек аудандық «Хантәңірі» халық театрының қойылымы ашты. Театр әртістері сахналық өнер арқылы көрерменге ұлттық мәдениеттің ерекшелігін жеткізді. Байқауға облыстың мәдениет және өнер саласындағы белгілі өкілдерінен құралған қазылар алқасы қатысты. Олардың қатарында Қазақстан Жазушылар одағының мүшесі, Алматы облысының мәдениет, архивтер және құжаттама басқармасының бөлім басшысы Төлеужан Ғұмаров, Ұста Дәркембай атындағы қолөнер музейінің директоры Дәулет Дәркембайұлы, Қазақстанның еңбек сіңірген әртісі, «Алтынай» мемлекеттік халық биі ансамблінің бас балетмейстері Ғазиза Әбдиева болды. Сондай-ақ ақын, Қазақстан Жазушылар одағы Алматы облыстық филиалының директоры Ержан Тоқтар, Сүйінбай атындағы облыстық филармонияның әншісі Мәншүк Тұрсынғазина және «Қобыз сарыны» фольклорлық-этнографиялық ансамблінің көркемдік жетекшісі Бекназар Құрмашұлы аудан өнерпаздарының шығармашылық жұмыстарын бағалады.
Салтанатты шара барысында Алматы облысының мәдениет, архивтер және құжаттама басқармасының басшысы Әнуар Үмбетәлиев пен облыстық халық шығармашылығы орталығының директоры Олжас Атаев құттықтау сөз сөйледі.
Одан кейін көрермен назарына аудан өнерпаздарының концерттік бағдарламасы ұсынылды. Сахна төрінде халық әндері шырқалып, ұлттық билер орындалды. Театрландырылған көріністер мен музыкалық қойылымдар арқылы Райымбек ауданының мәдени өмірі мен шығармашылық мүмкіндіктері таныстырылды.
Байқаудың басты мақсаты – ауылдық жерлердегі мәдениет мекемелерінің жұмысын жандандыру, жергілікті өнер ұжымдарының кәсіби деңгейін көтеру және ұлттық өнердің сабақтастығын сақтау. Сонымен қатар мұндай шаралар ауылдағы талантты жастарды анықтауға, олардың шығармашылық қабілеттерін дамытуға және өңірдің мәдени мұрасын кеңінен насихаттауға мүмкіндік береді. Райымбек ауданында өткен мәдениет күндері жергілікті өнерпаздардың шығармашылық ізденісін көрсетіп қана қоймай, ұлттық қолөнер, театр, музыка және би өнерін бір алаңда тоғыстырды.
Айта кетейік, «Ауылым – алтын бесігім!» мәдениет күндері Алматы облысының аудандары мен қалаларында дәстүрлі түрде өткізіліп келеді. Байқау өңірдегі мәдениет саласының дамуын бағалауға, шығармашылық ұжымдар арасында тәжірибе алмасуға және ұлттық құндылықтарды насихаттауға бағытталған.
