ҚР Туризм және спорт министрлігінің мәліметінше, 6 қыркүйекте спортшылар көкпар, көкбөрі, тоғызқұмалақ, мангала және овари бойынша жүлделерге таласты.
Әсіресе зияткерлік спорт түрлерінен Қазақстан құрамасы жоғары нәтиже көрсетті. Тоғызқұмалақтан отандық спортшылар 4 алтын және 2 күміс медаль жеңіп алды.
Мангала сайысында да Қазақстан құрамасы жүлдеге ілікті. Ел спортшылары 2 алтын, 2 күміс және 1 қола медаль иеленді. Сондай-ақ Африка халықтарының дәстүрлі зияткерлік ойыны – овариден де қазақстандық спортшылар жүлдегерлер қатарынан көрінді.
Ал көкбөріден өткен финалда Қазақстан мен Қырғызстан құрамалары кездесті. Шешуші бәсекеде Қырғызстан құрамасы басым түсіп, алтын медальға ие болды. Қазақстандық спортшылар күміс жүлдені қанағат тұтты.
Осылайша, VI Дүниежүзілік көшпенділер ойындарында Қазақстан құрамасының еншісіндегі алтын медаль саны 32-ге жетті.
