Алдын ала мәлімет бойынша, жекелеген учаскелердегі өнімділік гектарына 5 тоннаға дейін жетіп отыр. Қазіргі көрсеткіштер сақталған жағдайда аталған алқаптан 3,5 мың тоннадан астам күнбағыс жинау жоспарланған.
«Бүгінде шаруалардың алдында тұрған міндет – өнім көлемін арттырумен қатар, әр гектардың тиімділігін көтеру. Қол жеткізілген көрсеткіштер заманауи агротехнологияларды қолдану, су ресурстарын ұтымды пайдалану және өндірісті тиімді ұйымдастыру нақты нәтижеге жеткізетінін көрсетіп отыр. Алматы облысында су үнемдеу технологияларын енгізу ауыл шаруашылығын дамытудың негізгі бағыттарының бірі болып қала береді», – деді Алматы облысының ауыл шаруашылығы басқармасының басшысы Димаш Сыдықов.
Жоғары өнімділікке қол жеткізудің негізгі факторларының бірі – алқаптың барлық аумағында тамшылатып суару технологиясының қолданылуы. Су үнемдеу технологиясы суару суын тиімді пайдалануға және ауыл шаруашылығы дақылдарының өсуіне қолайлы жағдай жасауға мүмкіндік береді.
Ауыл шаруашылығы өндірісін дамытуға мемлекеттік қолдау шаралары да ықпал етуде. Алматы облысының ауыл шаруашылығы басқармасы қолданыстағы субсидиялау бағдарламалары аясында ауыл шаруашылығы тауарын өндірушілерге мемлекеттік қолдау көрсетіп келеді. Оның ішінде су үнемдеу технологияларын енгізуге және ауыл шаруашылығы техникаларын жаңартуға бағытталған қолдау шаралары қарастырылған.
Жиналған өнімнің басым бөлігі сыртқы нарыққа бағытталады. Күнбағыс өнімінің шамамен 80 пайызын экспортқа шығару жоспарланып отыр. Бұл өткізу нарықтарын кеңейтіп, өңірдің агроөнеркәсіптік кешеніндегі экспорттық әлеуетті арттыруға мүмкіндік береді.
Жинау науқаны жалғасуда. Заманауи агротехнологияларды енгізу, су ресурстарын ұтымды пайдалану және материалдық-техникалық базаны жаңарту ауыл шаруашылығы өндірісінің тиімділігін арттырып, Алматы облысының аграрлық әлеуетін одан әрі нығайтуға мүмкіндік береді.
