Қазақстан соңғы бірнеше онжылдықтағы ең ауқымды инвестициялық кезеңдердің біріне аяқ басуда. Қазір елде әрқайсысының құны 1 млрд доллардан асатын 13 мегажоба жарияланған. Олардың жалпы құны 124 млрд доллардан асады.
Осы ірі инвестициялық портфельдегі маңызды жобалардың бірі Алматы облысына тиесілі.
Үлкен ауылында алғашқы АЭС салынады
Алматы облысының Үлкен ауылы маңында Қазақстандағы алғашқы атом электр станциясын салу жоспарланған. «Балқаш» АЭС-інің болжамды құны 16,4 млрд долларды құрайды. Жобаның бас мердігері ретінде ресейлік «Росатом» белгіленген.
Жоспар бойынша жоба құнының негізгі бөлігі Ресей тарапынан берілетін несие есебінен қаржыландырылып, қалған шығынды Қазақстан Үкіметі өтейді.
АЭС салуға дайындық жұмыстары басталып та кетті. Үлкен ауылында инженерлік іздестіру жұмыстары 2025 жылдың тамызында қолға алынған. Негізгі құрылыс жұмыстарын 2027 жылы бастау, ал атом электр станциясын 2035–2036 жылдары пайдалануға беру жоспарланып отыр.
Жоба жүзеге асқан жағдайда Алматы облысы елдің энергетикалық инфрақұрылымындағы стратегиялық маңызы жоғары өңірлердің біріне айналмақ.
Алайда миллиардтаған долларлық жобаларды жүзеге асыру ұзақ уақытты қажет етеді. Жобалау, қаржыландыру, құрылысқа дайындық жұмыстары бірнеше жылға созылуы мүмкін. Сондықтан АЭС-тің құны, іске асырылу мерзімі мен жекелеген техникалық параметрлері алдағы уақытта өзгеруі ықтимал.
Соған қарамастан, 16,4 млрд долларлық АЭС құрылысы Алматы облысында жоспарланған ең ауқымды инвестициялық жобалардың бірі болып отыр. Оның жүзеге асырылуы өңірдің ғана емес, жалпы Қазақстанның энергетикалық жүйесінің дамуына елеулі ықпал етуі мүмкін.
