Жаңа кешен Алматы облысының Арна ауылында салынып жатыр. Оның жобалық қуаты жылына 12 миллион инкубациялық жұмыртқа өндіруге есептелген.
Кәсіпорынның жеке асыл тұқымды репродукторын іске қосуы құс фабрикасын сапалы инкубациялық жұмыртқамен тұрақты қамтамасыз етуге мүмкіндік береді. Сонымен қатар өндірістік үдерістің тұрақтылығын арттырып, отандық құс шаруашылығының импорттық өнімге тәуелділігін азайту көзделіп отыр.
Жобаны жүзеге асыру барысында заманауи ветеринариялық-санитариялық талаптарға ерекше көңіл бөлінген. Жаңа кешен асыл тұқымды материалдың шығу тегі мен сапасын бақылауды күшейтіп, түрлі аурулардың таралу қаупін төмендетуге мүмкіндік береді. Бұл өз кезегінде құс шаруашылығы саласындағы биологиялық қауіпсіздікті және елдің азық-түлік қауіпсіздігін нығайтуға ықпал етпек.
Жобаның өңір үшін әлеуметтік-экономикалық маңызы да жоғары. Репродуктор пайдалануға берілгеннен кейін «Алатау-құс» АҚ қызметкерлерінің саны шамамен 100 адамға артады. Осылайша жаңа жұмыс орындары ашылып, жергілікті тұрғындардың тұрақты жұмыспен қамтылуына мүмкіндік жасалады. Сонымен бірге бюджетке түсетін салық көлемі де ұлғаяды деп күтілуде.
Қазіргі уақытта нысанның құрылысы қарқынды жүріп жатыр. Жоба құс фабрикасының өз қаражаты есебінен жүзеге асырылуда.
Жаңа репродуктордың құрылысы кәсіпорынның өндірістік алаңын кеңейтіп қана қоймай, отандық құс шаруашылығын дамытуға, жаңа жұмыс орындарын құруға, биологиялық қауіпсіздікті күшейтуге және Қазақстанның азық-түлік тәуелсіздігін нығайтуға бағытталған.
