Ведомство мәліметінше, білім беру ұйымдарының ата-аналарды мектеп формасын белгілі бір өндірушіден, брендтен, тігін шеберханасынан немесе дүкеннен сатып алуға міндеттеуге құқығы жоқ.
Басқарма түсіндіргендей, мектеп формасына қойылатын талаптар Қазақстан Республикасы Оқу-ағарту министрлігінің тиісті бұйрығымен реттеледі. Құжатқа сәйкес, мектептер бірыңғай стильді, түсті және оқушылардың сыртқы келбетіне қатысты жалпы талаптарды ғана белгілей алады. Алайда мектеп әкімшілігі ата-аналарға мектеп формасын нақты бір жерден сатып алуды талап ете алмайды.
Сонымен қатар, мектеп формасына қатысты кез келген шешім білім беру ұйымының басшылығы тарапынан ата-аналар қауымдастығының қатысуымен ашық талқыланып, қолданыстағы заңнама талаптарына сәйкес қабылдануы тиіс.
Білім басқармасы бұл талаптардың сақталуы ерекше бақылауда екенін атап өтті. Егер мектеп тарапынан заң талаптары бұзылды деген өтініштер келіп түссе, тиісті тексеру жүргізіледі. Заң бұзушылық фактілері расталған жағдайда жауапты тұлғаларға қолданыстағы заңнамаға сәйкес шаралар қолданылады.
Мектеп формасын тек белгілі бір сатушыдан сатып алуға мәжбүрлеу немесе өзге де құқықтарының бұзылғанын байқаған ата-аналар Алматы облысының білім басқармасына немесе аудандық білім бөлімдеріне жүгіне алады. Әрбір өтініш заңнамада белгіленген тәртіппен қаралып, тиісті шешім қабылданады.
