Баланың әкесінің айтуынша, оқиға Түркиядан оралғаннан кейін басталған. Сапар барысында баланың денсаулығы сыр беріп, қатты жөтеліп, дене қызуы көтерілген. Қазақстанға келген соң оның мұрнынан қан кетіп, шұғыл түрде Алматы облыстық балалар клиникалық ауруханасына жеткізілген.
Дәрігерлер тексеру нәтижесінде балаға сирек кездесетін аутоиммунды ауру – иммундық тромбоцитопения диагнозын қойған. Емдеу барысында оған қан құйылып, қажетті медициналық көмек көрсетілген.
Кейін науқас әрі қарай ем қабылдау үшін Педиатрия және балалар хирургиясы ғылыми орталығына жолданған. Сол жерде жүргізілген зертханалық тексерулер кезінде ПТР әдісі арқылы С гепатиті вирусы анықталған.
«Біз бұл ауруханаға баламыздың мұрнынан қан кеткен соң түстік. Тексеруден кейін оған иммундық тромбоцитопения диагнозы қойылып, қан құйылды. Біздің ойымызша, вирус дәл осы процедура кезінде жұққан», – дейді баланың әкесі.
Ата-анасы осы жағдайға байланысты Президент Әкімшілігіне хат жолдап, істі ерекше бақылауға алуды сұраған.
Алматы облыстық балалар клиникалық ауруханасында аталған дерекке байланысты қызметтік тексеру басталған.
