Lider.kz іздестіру-құтқару еріктілер қозғалысының мәліметінше, сәби 2025 жылғы 24 қазанда Алматы облысының Жамбыл ауданында Алматы – Бішкек автожолының бойынан табылған. Жол бойымен өтіп бара жатқан азаматтар кішкентай қызды байқап қалып, бірден полиция қызметкерлеріне хабар берген.
Табылған кезде қыз баланың жасы шамамен 7–8 ай болған. Оның үстінде ақ-қызғылт түсті комбинезон, ал басында қызғылт түсті телпек болған.
Қазіргі уақытта құқық қорғау органдары мен еріктілер сәбидің анасы мен жақын туыстарының жеке басын анықтау жұмыстарын жалғастыруда.
Осыған байланысты Lider.kz ұйымы бүлдіршіннің анасы, туыстары немесе оның шығу тегі туралы қандай да бір мәлімет білетін азаматтарды бейжай қалмауға шақырады.
Кез келген ақпаратқа ие болған тұрғындардан полицияға немесе Lider.kz іздестіру-құтқару еріктілер қозғалысына хабарласу сұралады.
Еріктілердің айтуынша, тіпті болмашы көрінген ақпараттың өзі сәбидің туған-туыстарын анықтауға және оның тағдырына қатысты маңызды мән-жайларды ашуға көмектесуі мүмкін.
