Қойманы салудағы мақсат — Қазақстандағы алма бақтарын қалпына келтіру. Мұнда жемістер Италия мен Нидерландының технологиялары арқылы өсіріледі. Алманың экспорттық тауар ретінде әлеуеті зор. 70 гектардан астам аумақта егілген бау-бақша тамшылату суару жүйесімен, су бассейнімен қамтылған. Енді алма сақтайтын бұл қойма жаңа мүмкіндіктерге жол ашады.
«Мұнда 2 мың тонна жеміс сақтауға болады. Қоймада реттелетін газды орта жүйесі мен қарапайым мұздатқыш бар. Келесі жылы дәл осындай жүйемен жабдықталған, қуаттылығы 3 мың тонна қойма саламыз», — дейді қойманы салған «Arnau Agro» ЖШС өндіріс жөніндегі директоры Руслан Оспанов.
Қойманың басты ерекшелігі мұнда ауаның химиялық құрамын өзгертуге болатын арнайы бокстар бар. Мұндай ортада жемістер бір жылға дейін сақталады. Қазір отандық өнім Ресейге экспортталып жатыр.
