Алматы облысы әкімдігінің ғимаратында өткен жиынға облыс әкімінің орынбасары Ғалымжан Майлыбаев, мемлекеттік органдардың өкілдері, өңірлердегі «Қоғамдық келісім» мекемелерінің директорлары, этномәдени бірлестіктердің жетекшілері, Қазақстан халқы Ассамблеясының мүшелері мен белсенді жастар қатысты.
Форум барысында этносаралық татулықты нығайту, қоғамдық келісімді сақтау және Қазақстан халқы Ассамблеясының қоғамдағы рөлін арттыру мәселелері жан-жақты талқыланды. Сондай-ақ мемлекеттік органдар, этномәдени бірлестіктер мен жастар ұйымдары арасындағы өзара ынтымақтастықты дамытуға басымдық берілді.
Іс-шарада Қазақстан Республикасы Мәдениет және ақпарат министрлігі Ведомствоаралық үйлестіру басқармасының басшысы Бақытжан Мастеков, «Алматы облыстық әзербайжан этномәдени бірлестігі» қоғамдық бірлестігінің төрағасы Анар Осман, «Қазақстан ұйғыр жастар одағы» республикалық қоғамдық бірлестігінің төрағасы Рустам Кайрыев және Алматы облысы «Ассамблея жастары» өкілдігінің төрағасы Валерия Плетнева баяндама жасап, қоғамдық келісімді сақтаудың өзекті бағыттары жөнінде пікірлерімен бөлісті.
Форум бағдарламасы тек пленарлық отырыспен шектелмейді. Қатысушылар үшін өңірдің мәдени-танымдық нысандарына экскурсиялар ұйымдастырылып, этносаралық келісімді нығайтудың үздік тәжірибелері талқыланатын алаңдар мен жастардың қатысуымен пікірталастар өткізу жоспарланған.
