Министрлік мәліметінше, елдің энергия жүйесінің тұрақты жұмысын қамтамасыз ету және электр энергиясын өндіретін нысандарды кезең-кезеңімен жаңғырту мақсатында 60 энергия өндіруші ұйымның шекті тарифтері қайта есептелген.
Ведомство өкілдері бұл шешім энергетикалық кәсіпорындардың қаржылық тұрақтылығын қамтамасыз етіп, жөндеу жұмыстарын уақытылы жүргізуге мүмкіндік беретінін атап өтті. Сондай-ақ жаңа тарифтер жабдықтардың сенімділігін сақтау мен жаңартуға бағытталған ұзақмерзімді инвестициялық бағдарламаларды жүзеге асыруға жағдай жасамақ.
Энергетика министрлігі электр станцияларын жаңғырту және өндірістік инфрақұрылымды дамыту елдің энергетикалық қауіпсіздігін нығайтудың маңызды тетіктерінің бірі болып саналатынын айтады.
Құжатқа сәйкес, жаңартылған шекті тарифтерді энергия өндіруші ұйымдар үшін 2026 жылғы 1 шілдеден бастап қолданысқа енгізу жоспарланып отыр.
Тарифтерге қатысты өзгерістер жобасы қазіргі уақытта қоғамдық талқылауға шығарылған. Құжат 30 маусымға дейін «Ашық НҚА» порталында жарияланып, тұрғындар мен сарапшылардың ұсыныстары қабылданады.
