ТЖМ мәліметінше, басты назар тұрғындар мен туристер көп жиналатын демалыс орындарына, оның ішінде Қапшағай су қоймасы мен Көлсай көлдеріне аударылған.
Маманда рейдтер күндіз де, түнде де жүргізілетінін айтады. Бақылау тиімділігін арттыру үшін заманауи техникалар пайдаланылуда.
«Су айдындарындағы қауіпсіздікті қамтамасыз ету мақсатында квадроциклдер, ұшқышсыз ұшу аппараттары және кинологиялық есептоптар тартылған», – деп хабарлады ТЖМ баспасөз қызметі.
Шомылу маусымы басталғалы 43 адам жауапқа тартылған
Құтқарушылар шомылу маусымы 1 маусымда басталғанымен, осы уақыт аралығында судағы қауіпсіздік талаптарын бұзған 43 азамат әкімшілік жауапкершілікке тартылғанын мәлімдеді.
Сонымен қатар, көліктік бақылау инспекциясымен бірлескен тексерулер барысында құжаттары мен тіркеу нөмірлері жоқ бес шағын көлемді кеме арнайы тұраққа қойылған.
Мамандар азаматтарды тек арнайы жабдықталған орындарда шомылуға, балаларды қараусыз қалдырмауға және судағы қауіпсіздік ережелерін қатаң сақтауға шақырады.
Балалар лагерлерінде түсіндіру жұмыстары жүріп жатыр
ТЖД қызметкерлері жазғы демалыс кезеңінде балалар қауіпсіздігіне де ерекше көңіл бөлуде. Өңірдегі сауықтыру лагерьлерінде судағы қауіпсіз мінез-құлық қағидалары бойынша арнайы дәрістер, нұсқамалар мен түсіндіру кездесулері ұйымдастырылып жатыр.
Ведомство өкілдері судағы қауіпсіздік талаптарын сақтамау қайғылы жағдайларға әкелуі мүмкін екенін еске салды. Әсіресе мас күйінде суға түсу, балаларды қараусыз қалдыру және тыйым салынған жерлерде шомылу ең қауіпті әрекеттердің бірі саналады.
Осыған байланысты құтқарушылар тұрғындарды демалыс кезінде сақтық шараларын ұмытпауға және төтенше жағдай туындаған жағдайда 112 нөміріне хабарласуға шақырды.
