Ведомство мәліметінше, мұндай схемалар көбіне әлеуметтік желілерде, мессенджерлерде немесе онлайн ойындарда басталады.
«Әдетте бәрі мессенджерде, онлайн ойында немесе әлеуметтік желіде бір хабарламадан басталады. Бейтаныс адам «жеңіл табыс» ұсынып, картаға түскен ақшаны басқаға жіберуді немесе қолма-қол ақшаға айналдыруды сұрайды. Шын мәнінде бұл ұрланған қаражатты жымқыру схемасы болып саналады», – деп мәлімдеді ІІМ.
Министрлік алаяқтар өздерінің ізін жасыру үшін «дроп» деп аталатын адамдарды пайдаланатынын айтады. Бұл жағдайда ақша бірнеше бөгде шот арқылы өткізіліп, қылмысты ұйымдастырушылардың кім екені анықталмай қалады.
ІІМ мұндай әрекеттерге байқамай араласудың өзі ауыр құқықтық салдарға әкелуі мүмкін екенін атап өтті.
«Мұндай операцияларға тіпті байқамай қатысу да ауыр салдарға әкелуі мүмкін», – делінген ведомство хабарламасында.
Осыған байланысты министрлік ата-аналар мен жасөспірімдерді сақ болуға шақырып, бірнеше маңызды ережені еске салды.
Атап айтқанда, азаматтарға банк карталарының деректерін және мобильді банк қосымшалары туралы мәліметтерді бөгде адамдарға бермеу, ақша аудару арқылы «жеңіл табыс табу» жөніндегі күмәнді ұсыныстарға келіспеу ұсынылады.
Сондай-ақ күмәнді жағдай туындаған жағдайда міндетті түрде ата-аналарға немесе сенімді ересек адамға хабарлау қажет.
